政壇：CY司局長齊聚鄉局團拜
新界鄉議局每年初七「人日」舉行嘅新春團拜，今年因為要讓路畀財政預算案，延至尋日年初九先舉行，但無損鄉紳嘅興致同面子，皆因政府三司同六個局長都有到場，仲有特首梁振英（CY）嘅特別「加持」，上任後首次現身鄉議局團拜，主席劉皇發（發叔）雙手摸摸塊面示意「搽咗油」，多謝大家畀面喎，又預告「明年再見」，似乎佢對連任主席定過抬油咁噃。
鄉議局團拜高官雲集，劉皇發（右二）摸摸塊面多謝大家畀面。
早前盛傳發叔有意交棒畀阿仔劉業強出任鄉議局主席，統領新界鄉紳，咁啱鄉議局五月換莊，今年會唔會係發叔最後一年以主席身份主持團拜呢？難得發叔聞言即時笑騎騎話：「梗係唔會啦，哈哈哈哈！」擺明預告仲會坐多四年主席位，一於做到八十幾歲先退休。
不過，可能因為新正頭要四出拜年，發叔近日似乎冇乜留意鄉情，被問到點睇有反水貨客市民明日到元朗踩場，發叔聽到先係呆一呆，話冇聽到喎，之後記者提醒佢先識回應。
