政壇：白鴿黨慶高官杯葛騎呢人盡現
民主黨（白鴿黨）原本去年舉行二十周年晚宴，但因為佔領行動要延至尋晚先舉行。不過，白鴿黨表明要否決政改，而該黨有「AV仁」之稱嘅何俊仁又揚言要辭職發動公投，結果政府問責高官齊齊杯葛晚宴，而往年「畀面」出席黨慶嘅前政務司司長唐英年都冇出席，就連贊助都冇。但就換來多個被指為「騎呢」、或受爭議同是非多多嘅人出席，真可謂係臭味相投。
「民主阿婆」陳方安生（中）到場後即與「AV仁」何俊仁（左）開心交談，真係臭味相投。
劉夢熊戴太陽眼鏡出席晚宴，自稱剛完成左眼視網膜手術。
夏千福無落區做騷，反而出席民主黨黨慶。
民主阿婆過氣熊現身
出席白鴿黨黨慶晚宴嘅，包括有「民主阿婆」之稱嘅前政務司司長陳方安生、有「小八國聯軍」首領外號嘅美國駐港總領事夏千福、人稱「廢官」嘅平等機會委員會主席周一嶽，同埋過氣嘅前全國政協委員劉夢熊。久未露面嘅劉夢熊戴住一副太陽眼鏡出席晚宴，原來佢左眼視網膜脫落，尋日先至喺私家醫院做完手術。佢引述醫生話，如果遲兩日求診，可能會導致左眼失明喎。
雖然一眾政府司局長都缺席杯葛白鴿黨晚宴，但審計署署長孫德基同行政會議召集人林煥光（WK）都有到場。不過，WK就先嚟一番訓話，認為負責任嘅政黨要考慮大局，要有積極解決問題嘅態度，而並非用你死我活方式或不問情由去「拉布」，意味警告白鴿黨咪同激進黨派為伍，要顧全大局。該黨最後籌得約三百六十萬元。
