立法會尋日舉行新春午宴,一眾高官、行政會議成員都有出席,唯獨泛民主派議員杯葛缺席。席間大家玩問答遊戲,被抽中玩遊戲嘅議員同官員表現都差強人意,第一輪問答環節中,兩隊都係四題選擇題先答中一題,到第二輪搶答環節時班議員仲大比數落後,五條選擇題先答中一題,真係爆!

王國興(左)舉牌搶答唔夠張志剛(右)舉得快。

范國威高舉「臨崖推狼」水墨畫示威。

代表議員上台玩遊戲嘅係議員鍾樹根、王國興同廖長江,而官員隊就由海關關長張雲正、勞工處處長唐智強同行政會議成員張志剛出戰。首輪問答環節,兩隊要各自答四條問題,但官員隊只係答中有七位議員屬羊嘅提問;議員雖然成日批評政府解決唔到本港房屋問題,但佢哋嗰隊竟然連施政報告預計一五/一六年度嘅公屋落成量都答唔到,關心真係好假囉。

搶答環節時,議員隊只搶答到一條有關立法會上年度通過議案數目嘅問題,仲要係出動到遊戲「請槍」錦囊,靠秘書長陳維安「幫口」先至答中。結果三套、每套五件嘅仿皮文具套裝獎品就落入官員隊手中,議員隊只得環保購物袋及保溫杯作安慰獎。

除咗遊戲環節,「長毛」梁國雄同范國威亦「踩場」贈興,分別準備咗「誠實豆沙包」同題為「臨崖推狼」嘅水墨畫畀出席春茗嘅特首梁振英(CY)做賀年禮物,但CY就全程冇理會佢哋。

第一手消息請下載on.cc東網iPhone/iPad/Android/Windows Phone Apps