政壇：縮沙唔掂港大 葉建源醜爆

遴選風波一爆出，葉建源同郭家麒即時跳出來批評特首肆意干預大學人事任命，做法就好似十五年前嘅港大民調風波翻版，時任特首辦高級特別助理路祥安被指干預港大民意研究計劃進行有關特首調查，要求立法會引用特權法成立專責委員會調查事件。內委會尋日原本討論兩人建議，但兩人一早已經抽走有關動議，搞到內委會開咗唔夠半個鐘就散會。葉建源話，要蒐集更多有關遴選港大副校長嘅最新資料，睇吓會否有其他發展。

被質疑雙重標準

郭家麒就話，原本佢以為星期二港大校務委員會開會後，會定出三個副校長人選，但校務委員會主席梁智鴻會後話，委員會只係批准兩個副校長任命，至於法律學院原院長陳文敏被傳獲推薦出任副校長（學術人事及資源）嘅任命，梁智鴻就話至今仲未收到物色委員會呈交嘅確認人選，所以佢想等埋最後一個副校長人選公布後，先至決定提唔提特權法調查喎。但據聞兩人話會提出特權法後，即時被其他泛民主派議員鬧爆，話佢哋質疑特首政治干預學術，但依家又要求立法會介入事件調查，擺明就係雙重標準，加上有指立法會介入會令事件進一步惡化，對學術機構並非好事，兩人只好一百八十度急轉彎收回建議，出頭變縮頭。