官富民窮添怨氣 開倉派糖此其時

話政府肥到襪都着唔落，絕對唔係誇張。呢，之前會計界普遍預計本年度財政盈餘達六、七百億元，點知高處未算高，據講最終埋單計數，盈餘可能達到九百億元，足足係鬍鬚曾舊年預測九十一億元嘅十倍，問你服未。

話時話，多估開支，少估收入，早就成為港府嘅慣技，歷任財爺都係同一路貨色。統計顯示，回歸以來嘅十八份預算案，足足有十四份「開大」，即係最終收入遠勝預期；「開細」嘅只有四份，而且全部喺早期出現。小數怕長計，咁多年來港府累積估少近七千億元盈餘，現時庫房滾存嘅七千八百幾億元財政儲備近九成係估錯數所得嘅「意外之財」，你話誇唔誇張吖？

唔使問阿貴，當中以鬍鬚曾錯得最離譜，平均每年少計盈餘六百億元。尤其係一○至一一年度預算案，最初預測會出現近三百億元赤字，點知最終錄得逾七百億元盈餘，錯估金額達一千零三億元，簡直匪夷所思。財爺經常性估錯數，變相減少政府對社會基建及民生政策嘅資源投放，唔怪得香港競爭力一蟹不如一蟹、基層市民生活一年不如一年喇。

面對庫房嚴重水浸，鬍鬚曾一方面罕有地承認未來幾年「年年有餘」，一方面繼續危言聳聽，聲稱十年後會出現赤字，港府需要作好準備喎。喂，以佢嘅小學雞數學水平，一年嘅財政尚且嚴重估錯，仲學人估十年後喎，盞笑大人個口咋。講到底，鬍鬚曾不斷以財赤恐嚇市民，無非想降低市民對預算案嘅期望，推卸政府責任，呢啲咁低劣嘅伎倆，有人信至奇吖。

即係咁，財爺嘅主要職責係善用儲備發展經濟，謀劃長遠，鬍鬚曾去年拋出「未來基金」，係龍係蛇，仲需要時間驗證。既然長遠政策得個吉，市民期望政府派糖就自然不過，尤其係現今社會矛盾尖銳，房屋問題嚴峻，民怨如火山沸騰，鬍鬚曾仲要做守財奴，盞自取其辱嘅咋。聽講今次預算案將會加糖，除咗退稅、免差餉等一次性措施加碼，仲會撥款支援時裝設計等創意產業喎，不妨拭目以待。