城中鏡：王健林傳巨資入股AC米蘭
內地巨富大連萬達老闆王健林又買新玩具？聽聞王巨富想收購「紅黑軍團」AC米蘭三成股權。要使幾多錢？傳聞話要成一點二至一點五億歐元，即係大拿拿十點五億至十三點二億港元！聽講佢已經同班主貝魯斯干尼嘅控股公司傾緊點收購，似乎志在必得。
王健林一向愛足球，早前已入股西甲馬德里體育會。（資料圖片）
王健林一向愛足球係人都知，冇幾耐之前，佢先用咗四千五百萬歐元買入西甲馬德里體育會兩成股權，仲做埋第二大股東。只不過諗唔到咁快又傳買第二隊。
王健林除咗曾經係內地首富外，仲係福布斯富豪榜排名第四十二位。不過，論到無人不識，佢位公子王思聰先至厲害，王公子言論大膽出位，公子早排嘅「擇偶胸大論」，仲搞到被內地官媒微博不點名批評「富二代」。阿爸王健林早排上央視節目時就解釋，話個仔只因讀番書，所以諗到乜就講乜。王健林咁着緊為個仔大力護航，梗係要，驚動到官媒批評，就唔係講笑。
