城中鏡：星展洋CEO派利是冧員工

農曆新年假期剛過，又要返工嘅打工仔最望收到老闆封開工大利是，新一年「利利是是」，工作順利。原來連外資銀行高層今時今日都入鄉隨俗，羊年開工第一Day就即落分行派利是。

龐華毅（右）入鄉隨俗向員工派利是。

星展係新加坡公司，香港CEO龐華毅更加係厄瓜多爾人，但原來佢年年都跟足華人傳統，向每位香港員工派開工利是。除星展外，花旗環球個人銀行服務總經理林鈺華，亦帶埋財神一齊落中環會德豐分行派利是，祝班員工羊年「喜氣羊羊」、萬事如意。

銀行吸客無停手，滙豐就趁新春之際推出百萬抽獎活動，凡係全面理財總值一百萬元以上嘅全新卓越理財客戶，都有機會贏取一百萬元現金；不過，幸運兒就只得一個。睇嚟，中獎難度大概同中六合彩相差無幾。