中文大學尋日舉辦傳媒新春茶敍，由校長沈祖堯率領副校長同各學院院長，齊齊着唐裝同大家拜年。沈祖堯除咗即席揮毫寫揮春，仲化身廚師，指揮副校長同院長，齊齊炮製「撈起」食品應節。不過，協理副校長馮通亦不讓沈祖堯專美，同剛入中文大學嘅哥哥馮康合奏歌曲「喜洋洋」助興。

「祖堯廚神」（右）帶領四位副校長和院長，齊齊炮製「撈起」應節。

馮通（左）同哥哥馮康拍住上合奏「喜洋洋」助興。

沈祖堯（右）又同陳家亮一齊寫「妙手仁心」揮春。

沈祖堯連同四位副校長同院長，齊齊着上寫住「祖堯廚神」嘅圍裙炮製「撈起」，所有食材都係喺校園內嘅天台花園種出嚟，沈祖堯仲單手抱起個巨型蘿蔔、一時又將個蘿蔔當BB咁抱住，不知幾風騷。不過，呢位「祖堯廚神」淨係做指揮，冇落手落腳整理食材。唔知新任商學院院長陳家樂係咪少入廚房，竟然連自己戴住嘅膠手套都切爛埋，被沈祖堯笑，好彩最終碟「撈起」都可以上到菜。

煮完「撈起」，沈祖堯又隨即「擺檔」寫揮春送給傳媒朋友，仲拍住醫學院院長陳家亮，寫「妙手仁心」揮春。自從沈祖堯上任中大校長後，得到好多人支持，但被問到會否參選下屆特首選舉，佢即刻「擰晒頭」，聲言冇興趣，仲自爆老婆都叫佢唔好參選。究竟邊個提起選特首，搞到沈太都要出聲呢？

馮康兄弟合奏娛賓

至於協理副校長馮通亦一顯身手，同哥哥馮康合奏歌曲「喜洋洋」，馮通負責彈琵琶，而馮康就拉最鍾意嘅二胡，兩兄弟合奏前仲好有默契咁「夾Key」。

馮康嚟緊會負責規劃籌建中文大學醫院，馮通仲話，今次係步入職場以來，兩兄弟首次並肩作戰，唔知佢哋最終會否修成正果呢？

第一手消息請下載on.cc東網iPhone/iPad/Android/Windows Phone Apps