政壇：莫乃光做大龍鳳補鑊
立法會財務委員會審議創新及科技局嘅撥款申請，喺情人節終極失敗，隸屬泛民主派陣營嘅立法會資訊科技界議員Charles莫乃光備受千夫所指，業界內外都鬧爆佢阻止唔到泛民「拉布」，甚至質疑佢嘅政治取態凌駕業界利益，分分鐘下屆冇得連任。唔知係咪因為咁，Charles尋日就煞有介事咁拉埋業界代表、學者同幾個泛民議員開記招，促請議員支持通過財委會周五審議嘅五十億元創新及科技基金申請。
設計圖片及對白
未同拉布三子溝通
創新及科技基金一向爭議唔大，為乜要整場大龍鳳支持撥款，唔通要為創科局胎死腹中補鑊？雖然Charles口講一單還一單，但承認呢個時勢係要搞大龍鳳o架喇，仲暗批創科局原本爭議唔大都變大，所以今次即使只係基金撥款都唔可以有任何閃失。不過，佢似乎未作好戰前準備，至今仍然未同社民連嘅「長毛」梁國雄、人民力量嘅陳偉業同陳志全「拉布」三子坐低斟斟，對方點諗仍然係未知之數。
Charles補充，基金截至去年十一月得番兩億元可用承擔額同十三億元現金餘額，預計年中就會使晒，政府一旦「斷水喉」，可能直接影響基金轄下多個研究項目及應用研發中心嘅運作。
雖然創科局被拉死咗，但政府講到明會捲土重來，商務及經濟發展局局長Greg蘇錦樑尋日出席活動時就話，期望下月十八日可以將成立創科局嘅建議再「保送」到立法會大會討論，希望大會配合政府，盡快通過喎。至於財委會嗰關，就要等今日預算案通過有關程序，再同其他部門商討後先再提交財委會咁話。
