北區區議員劉國勳同太太呂迪明尋日同埋十幾個義工朋友，去咗其中一個義工位於深圳龍崗嘅祖屋拜年，唔去過都唔知原來嗰個義工屋企咁大，唔單止屋內裝修靚，天台更加令人眼前一亮。

劉國勳同太太呂迪明到義工位於深圳龍崗嘅祖屋拜年。（互聯網圖片）

劉國勳話成個天台都種滿自家耕作嘅蔬菜，有番茄又有荷蘭豆，佢哋仲即場摘咗大堆新鮮荷蘭豆同菜加餸。當問及有冇幫手煮飯，慰勞一班勞苦功高嘅義工，佢即刻笑住咁話，煮嘢唔係佢專長，佢當然係邊唱歌邊等食。

劉國勳又提及自己今個新年特別忙，單係寫揮春派畀街坊都寫咗九次，又話每逢新年香港周圍都好逼人，所以聽日會同太太一齊過澳門，一方面可以同住喺當地嘅婆婆拜年，另一方面可以避開人潮，仲可趁機會休息一、兩日，一舉三得！

第一手消息請下載on.cc東網iPhone/iPad/Android/Windows Phone Apps