宣傳廣告教落，「贏咗場交，輸咗頭家，值得咩？」一家人應該互相尊重，家嘈屋閉肯定冇運行。睇吓最近嘅所謂反水客示威，搞到嘈喧巴閉，七國咁亂，係人都怕怕喇，香港又點會有運行吖。

呢，激進團體繼「光復屯門」之後，又「捍衞沙田」，場面要幾混亂有幾混亂，要幾失控有幾失控，聽講佢哋遲啲仲會「光復元朗」添，到時唔知又會亂成點咯。

冇錯，水貨活動猖獗，極之擾民，市民不滿絕對可以理解。之但係，咁係咪等於可以罔顧法紀、歧視旅客呢？有立法會議員就講得啱嘞，示威者咁做唔止倒米，直情破壞香港好客之都嘅形象，得不償失。

咁又係呀，雖然唔少水貨客係內地人，但香港人亦佔咗好多，乜都計喺內地旅客頭上，根本唔公平。再講吖，內地旅客來港觀光消費，唔係偷唔係搶，有利香港經濟，點解要受到不禮貌對待呢？己所不欲，勿施於人，如果示威人士去外地旅行畀人咁樣歧視同驅趕，又會有乜感受呢？

即係咁，激進示威手段固然不可取，但任由中港矛盾惡化亦唔係辦法。政制及內地事務局局長譚志源話喎，市民唔應該敵視內地旅客，但理解水貨活動為市民帶來不便，計劃增加遠離民居嘅旅遊購物點，又認為係時候檢討個人遊政策。

當局肯正視問題梗係好啦，問題係，檢討個人遊政策講就容易，但究竟點樣檢討，幾多旅客先至謂之適當，當局心中無底，純粹係大隻講咋。好似收緊一簽多行咁吖，當局去年已經話檢討，仲飛去北京商討添，結果咪一樣無影無蹤，不了了之。無他嘅，收緊個人遊係咪可以杜絕水貨冇人知，但打擊本港旅遊業就係不爭嘅事實，最怕矯枉過正，內地旅客望而卻步，香港經濟就死得嘅喇。

唔係杞人憂天，去年訪港旅客話就話創新高，但零售業銷貨總值就出現十一年來首次下跌，淨係十二月已經大跌百分之三點九，問你怕未。出現咁嘅情況，固然同內地反腐及旅客改變消費模式有關，但香港經常上演「驅蝗」、「光復」鬧劇，內地客貼錢買難受，唔卻步就奇喇。

不可不知，內地叫停個人遊好易嘅咋，到時受害嘅咪又係香港。針無兩頭利，香港人究竟想耳根清淨，定係和氣生財，依家係時候諗清諗楚，認真選擇喇，叮！

第一手消息請下載on.cc東網iPhone/iPad/Android/Windows Phone Apps