城中鏡：鄉紳名人天倫樂 聚首大談湊仔經
農曆新年最開心嘅莫過於一家團圓享受天倫樂，唔少人都選擇陪家人過完年先再去外遊。沙田馬場日前舉辦「鄉議局盃」賽事，除咗一班鄉紳捧場外，仲有鄉議局主席劉皇發孻女劉玉蓮（Virginia）同丈夫兼離島區議員余漢坤（Randy）。佢哋一家好開心，Randy大爆子女性格頑皮，明知佢有少少整潔癖，就故意喺佢面前搗亂，結果，反而鍛煉咗佢嘅耐性喎。
劉展灝（左）同太太即將抱孫，喜上眉梢。
劉玉蓮（左）同余漢坤有三個精叻小朋友。
劉燊濤（左）與嚴子杰交流湊子女心得。
Randy笑言，依家啲小朋友進化咗，唔單止識好多新科技，察言觀色亦一流，比起佢細個醒目得多。佢仲話，自從家中多咗幾個小朋友後，自己唔止耐性好咗，應酬次數都少咗喎。另一邊廂，仁濟醫院前主席嚴玉麟的大仔嚴子杰（Jacky）家中亦多咗個新成員一齊過農曆年。Jacky話，囡囡啱啱出世兩個月，知道太太每日要照顧個囡囡好辛苦，所以情人節就同太太出街食飯慶祝，係太太生完後首次外出。
劉展灝等抱孫
雖然Jacky經常四出公幹，但都會盡量抽時間分擔湊女任務，好似凌晨四點及早上七點鐘，佢就爬起身餵女兒食奶，仲拍埋片記錄低添！臨近歲晚，佢笑言已買定一大個籃，準備帶囡囡一齊出去逗利是，幸福滿瀉。
至於香港工業總會青委副主席劉燊濤（Gary）亦即將有喜，太太預產期係二十五號，撞正初七「人日」。對於買咩奶粉及尿片，佢早已向Jacky取經，目前只欠個名未改好，留待佢爸爸、工總主席劉展灝決定。劉展灝則興奮第一次抱孫，又感慨個仔眨吓眼已經咁大，回想當年喺屋企教個仔踢波，踢爛晒啲玻璃杯畀老婆鬧，會心一笑。
