政壇：搞搞政：追緝殺局元兇 IT界劍指莫乃光

創新及科技局（創科局）喺情人節難產，業界一腔怒火難平，仲計劃發起行動向殺局兇手及幫兇洩憤，有人更毫不客氣指，目前最迫切嘅應該係成立「創科局治喪委員會」，資訊科技界立法會議員莫乃光（Charles）更責無旁貸，睇嚟業界嘅火藥味已經進一步擴散。

（設計圖片及對白）

被斥未為業界阻拉布

業界人士話，之前已預計創科局多數出師未捷身先死，但一班業界代表仍然盡力推動，可惜「布又剪過、花又送過」，更拉隊前後三次去立法會外請願，結果仍大失所望。

講講吓，佢哋提到Charles未能阻止泛民主派「拉布」，更唔覺得佢為成立創科局盡全力噃。有人甚至質疑，究竟佢嘅取態係政治凌駕業界，抑或業界凌駕政治？又話如果佢唔肯為業界發聲，不如唔好做該界別代表，改為直選好過，無謂辜負一班選民。

Charles就話，佢希望可以成立創科局，可惜好多嘢都控制唔到，例如政府本身有好多問題、成件事被政治化等。而政治同業界係不可分割，冇話邊樣凌駕邊樣喎。

佢仲話，希望政府可以正面啲面對呢件事，下次清楚交代創科局嘅藍圖同策略，相信有議員會支持，當然泛民亦唔好再「拉布」啦。呢個解釋，業界又滿唔滿意呢？