政壇：夏千福賀年騷似有暗示
美國駐港總領事夏千福去年率隊以「小八國聯軍」形式出巡落區做騷，最終被中方官員狠批後，夏千福已經低調咗一段時間，即使罕有現身活動，亦對政事三緘其口。不過，夏千福尋日又再度「出山」，推出一段新春賀年短片，上載到美領事館官方社交網站。片段講述夏千福在領事館內四出問人新春有何好去處，其中一個鏡頭影到一名領事館官員手執一份《大公報》閱讀，唔知想暗示咩呢？
夏千福（右）跟撕紙老師傅學撕一個「春」字，但睇多過做。（互聯網圖片）
夏千福日前已透露拍緊賀年短片，估唔到尋日已經上載短片。內容描述佢煩惱緊新春有乜好去處，結果所有人都請佢食「檸檬」，當佢去到領事館新聞文化處時，負責人就拎起一份《大公報》扮閱報，然後冷冷淡淡同夏千福講：「no comment（不予置評）」，夏千福惟有再問其他人。其實領事館職員無緣無故拎起一份《大公報》，到底一早有目的準備好或事有湊巧，以及想暗示啲咩，相信只有佢哋先知道。
最後夏千福從一隻羊公仔獲得靈感，去咗九龍城寨公園搵一位撕紙老師傅傳授技藝，教佢如何徒手撕出一個「春」字，但夏千福只係睇多過做，可能個「春」字對佢呢位洋人來說太複雜，相信撕一個英文字母可能簡單得多。
