政壇：財會加時慢必拉布就住
泛民主派議員喺立法會大打拉布戰，搞到議會工作慢吞吞，財委會依家仲係審議緊嚴重滯後嘅議程，上周創科局宣告拉倒後，港府火速提出要求立法會財務委員會喺本月底同三月下旬加開共三節會議，加時工作係好消息，但泛民會唔會拉布係關鍵，漁農界立法會議員何俊賢就希望泛民班人喺漁業基金撥款上「高抬貴手」。
創科注資申請料成戰場
根據政府要求加時嘅文件指，嚟緊嘅撥款議案有早前被抽起嘅漁業發展貸款基金、創新及科技基金等撥款申請，人力議員陳志全接受查詢時話，佢唔會再阻延漁業發展貸款基金撥款，會按正常程序審議，即係「應問就問」，不過，講到創新及科技基金撥款申請，佢就顯得有啲保留，原因係近日瑞典卡羅琳醫學院事件或涉利益問題，因此要小心審議有關撥款。
照咁睇，政府向創新及科技基金注資五十億元嘅申請，分分鐘成為下一波拉布嘅新戰場，排後邊嘅議程會唔會凍過水呢？
