政壇：霍啟山轟港青交流唔掂
青年工作成為城中焦點，由佔領行動圍城多日，到唔少青年有港獨傾向等，在在顯示本港香港青年教育同公民意識出咗問題，霍家第三代、身兼渝港青年交流促進會會長嘅霍啟山都對青年工作有怨言，日前仲罕有批評本港青年交流工作係對接失當，組織之間又鬆散，甚至重量唔重質，導致浪費資源。
（設計圖片及對白）
啟山繼承家族搞體育事業嘅衣鉢，近年專注搞小型足球會，議政真係比較少有，今次佢一反低調作風，大膽「發炮」，的確相當罕有。到底有咩令佢不吐不快？
啟山有感而發話，雖然社會各界積極推動唔同層面嘅兩地青年交流，各式主題、活動應有盡有，但可惜缺乏有效溝通同執行力，出現服務重疊、對接失當，各地出席人數唔平均，甚至只係重量唔重質，導致輻射面有限。佢明言，青年工作係對人，淨係有心係唔夠嘅！
倡建粵港澳青年創業平台
好似阿里巴巴主席馬雲帶頭攞十億元出嚟畀青年人創業，試問香港人又點可以得個講字喎？點先幫到青年人？啟山提議搞個「想創就創旅程」，為廣州、香港、澳門嘅準大學畢業生同畢業新丁搭建一個互聯網平台，以有「新廣州」之稱嘅南沙為據點，拉埋粵港澳三地嘅政府部門、各大院校、投資基金、龍頭企業同青年組織，提供一條龍式創業服務。佢仲建議，喺呢個平台提供埋辦理出入境簽證、交通住宿、知識產權同融資等貼士，等有意落戶內地嘅青年人唔使亂打亂撞。
啟山想法多多，都係希望本地青年正確認識自己同內地，佢曾經多次親身帶青年交流團到內地訪問，對呢方面嘅運作了解自然比一般人多，今次少有開炮，值得民政事務局同主辦青年活動嘅機構好好研究吓。
