賀年毒品熱賣 監管不力靠害
「恭喜發財！利是逗來！」農曆新年又到，最開心嘅梗係小朋友喇，除咗有假放，有好嘢食，有揮春貼，仲有利是逗添，不過唔講唔知，啲利是封可能係含致癌物質嘅「賀年毒禮」，而且愈靚愈毒，隨時中咗招都唔知。
唔係靠嚇o架。本報記者將喺市面買嘅八款賀年產品，好似揮春、利是封、吊飾同全盒等，交畀室內空氣處理顧問檢驗，講出嚟都冇人信，居然有五款產品嘅揮發性有機化合物VOC超標，四款甲醛含量超標。最誇張嘅一款揮春，揮發性有機化合物超標接近六倍，亦有利是封甲醛超標一倍，問你怕未。所以話啫，路邊野花不要採，賣相愈好愈要小心，咪以為賀年禮品紅噹噹好意頭，分分鐘毒過響尾蛇呀！
究竟VOC產品有幾毒？嗱，據知含有三千幾種有毒化學物質，長時間喺咁嘅環境逗留會刺激眼睛、鼻膜同喉嚨，搞到眼水、鼻水一齊流，仲有喉嚨痕同咳嗽等徵狀，嚴重嘅更可能引發哮喘復發或慢性氣管問題添。市民李太就係其中一位受害者嘞，佢早前買揮春同利是封過年，一拆開膠袋就聞到好大陣化學味，聞咗無耐就頭痛，陣味過咗兩日都未散，都咪話唔得人驚。
至於甲醛咯喎，本身係工業原料，用途廣泛，不過毒性極大，已經被世界衞生組織列為致癌物，仲可能導致胎兒畸形添，認真唔講得笑。專家建議，甲醛產品可免則免，如果聞到有刺鼻氣味，都係唔買為妙；即使要買，都要先打開包裝透吓氣。講就咁講咯，普通市民尤其係小朋友點會諗到連賀年產品都暗藏「殺機」o架，如果掂完啲貨品就用手攞嘢食，或者直接舔利是封，分分鐘等同吸毒，咁就大鑊嘞。
大家可能有個疑問，賀年物品咁多毒居然可以賣通街，唔通無王管嘅咩？冇錯，真係無王管o架。原來家陣受規管嘅六類含揮發性有機化合物嘅消費品，唔包括賀年產品呢類家居用品，法例存在明顯漏洞，市民隨時中招有乜出奇吖。
有立法會議員就講得啱嘞，由於有關產品並無列明警告，海關等部門好應該加強巡查同抽驗，保護市民健康，但港府要聽人講至得o架。一句到尾，賀年毒禮賣到成行成市，除咗市民警惕性低，更反映當局監管不足，執法不力，搞到市民歡度佳節變慢性中毒、慢性自殺，你話官僚唔係靠害都冇人信喇，叮！
