城中鏡：着紅衫攝太歲何倍倩新年重意頭
「恒生新抱」Anina何倍倩向來重視中國傳統節日，尤其係農曆新年，一定要一家人齊齊整整吃餐團年飯，新一年吃飽喝足，日前佢到大棧海味店為新年飯入貨，選購花膠、鮑魚、冬蟲草、冬菇、蠔豉等，其中店內珍藏兩條價值六位數嘅花膠王同埋有逾六十年歷史、巿值過百萬嘅鎮店花膠，令Anina大開眼界。
睇到巿值過百萬嘅鎮店花膠，令何倍倩大開眼界。
Anina話會為家人下廚煮團年飯，佢比較喜歡健康又好意頭嘅菜式，例如花膠湯同髮菜蠔豉，佢話：「我冇預幾多Budget，遇到啱又品質好嘅就會買，海味呢類乾貨，買多啲都唔怕，因為可以擺好耐。」除咗團年飯外，外表新潮嘅佢相當注重意頭，佢舉例話：「新年一定要着紅色衫，覺得紅色好應節又醒神，但老公就笑我老土，我都要小朋友着嘅衫有紅色元素，我仲會幫自己同家人攝太歲，又會將大桔放喺小朋友床頭，攞大吉大利嘅好兆頭。」
育有三名小朋友嘅Anina喜歡全家出動拜年，佢笑言朋友經常開玩笑指蝕本給佢，佢又會將小朋友嘅利是錢儲起，並趁機教導佢哋理財之道：「我個大仔今年五歲，生日錢連利是錢儲埋都有六位數o架！我好早已經幫小朋友開咗銀行戶口，小朋友唔可以畀佢哋有太多錢。」至於新年願望，Anina覺得上一年有太多天災人禍，希望羊年世界和平，香港人開開心心。
