城中鏡：博愛建最大安老院譚姜美珠想霸定位
博愛醫院年前獲地產商捐出屯門藍地十萬平方呎地皮，興建長者護養及護理中心，尋日擇好良辰吉日舉行動土禮。博愛醫院喺眾慈善團體中獲贈靚地建院，董事局候任主席譚姜美珠自然喜上眉梢，仲話院方正計劃喺地皮附近另覓地方，興建護理人員培訓學校同小型醫院，為呢間全港以至東南亞規模最大嘅安老院提供一站式安老服務。
博愛醫院主席何榮添（左）將於四月交棒畀譚姜美珠（右）。
張建宗（站立者）另擇日子探訪安老院，避免喺流感高峰期「播毒」。
陳李妮漏低咗對皮鞋喺海南，好彩最終搵得番。
天台設花園 地下鋪草皮
博愛醫院除咗舉行動土禮，仲大排筵席五十圍，宴請長者食盆菜。譚太進一步透露安老院大計，屆時院舍除咗將天台設計成綠化園藝空間，地下亦會鋪植草皮畀長者打草地滾球，長者入住院舍絕對唔侷促，床位收費亦暫定同博愛轄下私家院舍差唔多，相信一定成為搶手貨，難怪譚太笑言自己都想擔櫈仔霸定位喇！
同場仲有博愛醫院副主席兼衍生集團主席彭少衍，佢話已執拾細軟，準備明日陪太太飛赴澳洲過年，行程主打當地多個國家公園，但彭少衍話行程由太太話事兼任導遊，佢負責找數就得！
不過，另一副主席Lily陳李妮日前赴老鄉海南出席會議時，就遇上小意外，回港前漏低咗對高踭鞋喺當地酒店，直至尋日先發現唔見咗，好彩酒店職員已經幫佢收起對鞋，佢先鬆一口氣。佢笑言對鞋跟足佢五年，失而復得感覺更開心。
博愛醫院興建安老院，幫政府縮短安老院舍輪候時間，勞工及福利局局長張建宗當然現身支持，仲滿場飛冧長者。不過，張建宗今年將唔按傳統，趁年初二探訪安老院，原來佢擔心近日時值流感高峰期，勞師動眾探訪長者可能容易散播病菌，寧願另擇吉日再探公公婆婆好過。
