本虫真係天生辛苦命，好似今日年廿九，仲要返堆填區做行屍走肉，如果輪迴畀我下世做番人，而淫賤黎又走得甩畜生道，我希望可以做番佢腦細，將痛苦千萬倍回贈畀佢。

正所謂日頭唔好講淫，忽見淫賤黎急急走埋嚟，唔係想屈我食飯啩。「阿虫，有冇利是封？我啱啱託啲朋友換咗新鈔，趁得閒入定先，過年最緊要大家開心！」嘩！我幫淫賤黎打工咁耐，年年都係收硬嘢五蚊雞，淫賤黎今年竟然準備咗新鈔，唔通轉死性？哦！我知喇，梗係淫賤黎五蚊都嫌多，搵咗啲越南盾之類嘅紙幣返嚟啦，果然夠孤寒！

淫賤黎似乎猜中我心中所想，譏道：「阿虫，咪以為好了解我，今年我用嚟封利是嘅唔係流通貨幣，係津巴布韋廢幣，我斷斤買返嚟嘅……哈哈哈！」本虫承認，真係低估咗淫賤黎呢個cheap神，我仲竟然有兩秒懷疑過佢會加碼，唉！發夢冇咁早，今晚都係早啲唞啦！

第一手消息請下載on.cc東網iPhone/iPad/Android/Windows Phone Apps