政壇：搞搞政：樹根羊年運勢領風騷

楊師傅話今年普遍議員運程都頗差，尤其農曆九月情況更明顯，不單小人是非及人事爭拗多，部分更要額外留神健康同感情狀況。好似生日後將轉入忌神運嘅新民黨葉劉淑儀，羊年凡事多阻滯，有「過剛則折」嘅局面，春夏較平凡，但秋冬不吉，要注意健康，特別係肺部氣管之患，而農曆十月小人是非更特別多！

生日後入丁酉大運

同樣春夏平凡、秋冬不利嘅仲有劉慧卿，佢大運沖日腳，忌神出現，流年多是非之餘，農曆六月最差。工聯會麥美娟更適逢傷官之年，有機會受小人是非、人事不和等問題困擾，春夏不順，要到冬季先轉好。同屬工聯會嘅鄧家彪亦要小心，農曆十二月會有大凶之象，但已在區議會選舉之後，唔知會發生乜事呢？

之不過，樹根嘅運勢似乎較佳。楊師傅話由於樹根三月生日後轉入丁酉大運，雖然流年不利，但有大運之助，可轉凶為吉，故依然風騷，只有農曆六、九月略差。至於同樹根一樣有副「戰鬥格」嘅蔣麗芸，羊年繼續有強悍本色，春夏不順多阻滯，但秋天大旺。

部分議員就要留意感情同健康問題，楊師傅話陳恒鑌流年吉凶參半，一得一失，春季因財失義，有感情麻煩。會計界梁繼昌亦流年不順，易破財同有感情煩惱；就連剛新婚嘅郭偉強都走唔甩，由於今年大運轉入忌神運，剋洩交加，有感情煩惱，可能婚後要花多啲心思同太太磨合喇！