政壇：家有「行政長官」象哥唔怕病
近排流感大爆發，好多立法會議員尋日都好着急問食物及衞生局局長高永文點搞，頭髮都白晒嘅進出口界議員「象哥」黃定光提問時，竟然講番自己細個時都經歷流感高峰期，「個個流住兩行鼻涕，好似鼻涕蟲咁」，於是阿媽就會一人畀一個香囊佢哋袋住，又會將用過嘅手巾仔浸滴露，舊時有好多民間智慧，點解依家唔見晒喎。
黃定光話細個患流感，媽媽就會畀個香囊佢袋住。（資料圖片）
象哥又搞爛gag話屋企個「行政長官」（太太）耐唔耐就要佢飲涼藥，飲咗就藥到病除咁話，佢問高永文中醫喺流感高峰期係咪可以發揮作用？高永文聽到，都唔知好嬲定好笑，笑住答佢：「你屋企個行政長官可能好清楚你體質，我冇意見！」對於香囊呢個偏方，佢作為醫生就相信實證醫學，中醫無疑對社區有好大貢獻，但係無論用乜嘢方法，都最好先徵詢專業意見。
