港交所今年喺大年初五開市,主席周松崗同行政總裁李小加例牌化身財神,向出市員大派利是!不過,聽聞今年派出嘅「大牛」五百元利是數目,會較去年少一半喎,得番十封!唔通港交所都想「縮皮」?

周松崗(右)同李小加(左)將喺年初五化身財神,向出市員大派利是。(資料圖片)

港交所過去兩年,都係派二十封「大牛」五百元、同十封「金牛」一千元利是;但今個羊年,只會「大牛」、「金牛」利是各派十封。

咁點解今年會少咗「大牛」利是o架?原來係因為港交所出市員數目買少見少,往年有成一百人,派三十封「大利是」,約有三分一人有大利是。但今年出市員得番六十幾人,派二十封「大利是」,同樣係有約三分一人有機會抽中「大利是」。

所以港交所都唔係縮皮嘅!事實上,佢哋當日仲會派出大量五十元利是,人人有份,永不落空。港交所淨係派利是,年年都派成幾萬元。

除咗派利是呢個指定動作外,羊年開市儀式,仲玩驚喜添!事關港交所今年會破天荒邀請「特別嘉賓」嚟開市儀式中表演。係咪好想知邊個係「特別嘉賓」呢?畀個貼士大家,一定唔係小加總裁。

第一手消息請下載on.cc東網iPhone/iPad/Android/Windows Phone Apps