淫審改革玩把戲 掩人耳目枉自欺

係咁嘅，淫審制度烏龍百出，《淫褻及不雅物品管制條例》千瘡百孔，當局迫於民意話要檢討同改革喎。結果一檢討就係六年，○九年展開首輪公眾諮詢，一二年進行次輪諮詢，之後就泥牛入海無晒聲氣，直到前日當局至鬼鬼祟祟拋出所謂最終修例建議。左三年右三年，以為今次有料到喇，點知又係新瓶舊酒，完全冇料到，純粹得啖笑。

根據當局建議，觸犯淫褻條例嘅懲罰將由現時最高罰款一百萬元提高到二百萬元，刑期就由監禁一年增至兩年，同時將審裁委員由現時約五百人逐步遞增至最多一千五百人。表面睇來似模似樣，係威係勢，其實又係虛應故事，敷衍民意。正如一位前審裁委員話齋，現行條例問題多多，七國咁亂，主要因為判定淫褻及不雅嘅準則不清，實際量刑過輕，當局唔釐清評級準則，依法量刑，就算將最高罰款提高到天文數字都嘥氣喇。

冇錯嘞，淫審處連何謂淫褻同不雅都搞唔清，居然連世界知名藝術品「大衞像」都評為不雅物品，成為國際大笑話，試問咁又點樣把關呢？仲有吖，同一輯外國女星Kelly Brook嘅照片，竟然有三種評級標準，登喺東方報業集團旗下報紙被評為二級不雅，登喺壹淫媒旗下爛果報就被評為一級非不雅，登喺本港有售嘅外國雜誌連送檢都慳番添，一法三制，你話係咪離譜吖？如果話當局唔係親疏有別，故意玩針對，細路仔都唔信喇！

嗱，就係因為當局親疏有別，香港先至會搞到烏煙瘴氣咋。係人都知，壹淫媒觸犯《淫褻及不雅物品管制條例》嘅紀錄已經多達一百二十幾宗，幾乎厚過電話簿咁滯，如果當局有法必執，執法必嚴，有人可能早就被罰到破產，甚至將牢底坐穿喇。但事實就係，壹淫媒次次都獲得放生，罰款重則幾萬，輕則一二千，從來冇人踎過一日監，可見所謂最高刑罰根本就係廢噏，呢啲咪就係「刑同虛設」囉。

事實證明，護淫本性難自棄，改革只係玩把戲，淫審制度已成為當局包庇淫媒、打壓異己嘅政治工具，又點會真心改革吖。咪話太一叮唔提醒，當局繼續放生淫賤傳媒，香港遲早淪為妖獸都市嘅咋，叮！