SUN搞作：少膽虫手記：冇料唔該識做啦

一早走條咁嘅茂利出嚟，我連佢係乜水都未知，多得肥豪呢個擦鞋仔通水，先知茂利係我哋嘅見習編輯，接連起錯幾條題，又唔識擦鞋咁囉。唉，呢啲咁無能嘅人，死何足惜？不過我叫實Q將佢拖走嗰陣，見佢眼淚鼻涕標晒出嚟，個可憐相都幾過癮，先冇打佢一身咋。

話時話，有時本虫真係懷疑，啲後生打壞，字都唔識多隻，到底啲乜乜物物學位證書係咪淘番嚟o架。講真喎，假學歷唔緊要呀，但係要識做先得o架！

講白啲，明知自己冇料到，就應該學好啲擦鞋之術，塞錢送禮畀本虫當買保命符，又點少得呢！偏偏啲細路，出到嚟社會仲以為喺學校，以為呢個吃人嘅社會，周圍都係善良嘅朋友，上司會好似老師咁循循善誘，我x你啦，係咪食懵咗呀！所以話，香港沉淪於新世代，點會無道理吖。