政壇：搞搞政：富貴黨征港島傳劉健儀出山
本地政黨經常嗌冇可塑性強嘅新血，下屆立法會選舉明年就登場，據聞人丁單薄嘅自由黨（富貴黨）最近都評估過，一旦立法會議員林大輝最終謝絕入黨，兼接收榮譽主席田北俊（田少）嘅新界東議席，黨內只好繼續搵老將出征，港島區更加可能需要由另外一名榮譽主席劉健儀出山，而田少本人亦都要焗玩。
（設計圖片）
佔領過後 中間派票源增
明年立法會選舉嘅港島區戰況好難預測，盛傳立法會主席曾鈺成同新民黨葉劉淑儀都會退下火線，最多排名單第二位，力谷新人上位。富貴黨內部評估認為，佔領行動過後，該黨嘅形象同得分有增無減，成功吸納到一批中間派票源，所以就諗住博一博，推舉劉健儀復出，再戰港島區。由於來屆選舉多位建制派大老如譚耀宗都棄選，如果劉健儀成功入局，以佢多年議會經驗，應該可以勝任立法會主席一職。
不過富貴黨可能算漏一點，就係來屆立法會選舉港島區議席由七變六，按推斷，泛民同建制好大可能平分秋色，各佔三席，咁新民黨、民建聯加工聯會已瓜分三個議席，富貴黨想攝位談何容易？再講，劉健儀上屆選舉只得萬幾票，短短幾年，票數會否倍增，大家心中有數。
