政壇：佳節添溫情化立會戾氣
一年一度情人節，唔少人都趁機冧吓他人，立法會尋日好熱鬧，雖然一眾議員要留守財會，繼續打拉布攻防戰，但情人節氣氛依然濃厚，有人請食朱古力，有人請食壽司，更有人請食麵包，為一直消耗耐性嘅議員帶來溫情。
莫乃光請食應節嘅朱古力。
尋日朝早開完財委會第一節會議後，財委會主席張宇人就買咗多盒麵包及蛋撻嚟慰勞議員，期間「拉布」議員黃毓民笑問會否在麵包落瀉藥，張宇人就回答：「唔使驚，唔會係瀉藥，最多係毒啞你。」驚大家冇愛情齋飲水會餓親嘅，仲有行政會議成員兼立法會議員葉劉淑儀，佢捧住啲壽司周圍派，自稱係「壽司女郎」，仲爆話收到一支女支持者送嘅粉紅色玫瑰花，笑言自己都唔弱喎！
議員林健鋒同莫乃光就大派應節嘅朱古力，當佢哋一見到新婚嘅漁農界議員何俊賢時，就笑佢唔使食朱古力都甜到漏喇！現場除咗有食物，仲有議員梁美芬印製嘅情人節書籤，書籤上印住「讓愛情走到底，讓幸福再走一步！」梁美芬話係喺泛民「拉布」時諗嘅。
