政壇：陳弘毅炒雜燴冀打動泛民
政改前景暗淡，港府官員表現得好悲觀，泛民政黨就繼續威脅唔會「袋住先」，依家最落力奔走嘅，似乎係唔死心嘅溫和派學者，當中就以基本法委員會委員陳弘毅唔放棄，繼白票守尾門方案之後，尋日又提修訂建議，今次雖然冇乜新意，甚至予人炒雜燴感覺，但佢為首次普選一再死，都真係唔話得。
對陳弘毅嘅方案，白鴿黨主席劉慧卿早前已經不耐煩，仲形容佢「走火入魔」，但陳懶理閒言閒語，尋日又喺一個政改研究會上提出「新」建議，將佢早前嘅「白票守尾門」方案，結合其他法律學者同溫和泛民提出過嘅「排序式」同「反對票」制度，再融合呈上，等選民喺將來嘅特首普選中有更多選擇，如揀一個候選人又得，分次序支持晒三位候選人又得，或者個個都反對、甚至直情投白票都得。佢再次拋波，都係希望泛民政黨再研究吓，唔好一口咬定唔袋、唔食、唔滯。
