雙貪求得上吉籤 香港法治好大鑊

話說有個學神今個星期三考車牌喎，懷疑驚肥佬，於是塞五百蚊畀考官「請飲茶」，周五被法庭判監兩個月。由案發、審訊到判刑，短短三日搞掂，仲快過粗製濫造嘅「七日鮮」港產片，問你服未。

講真，類似事件真係多到天光都數唔完。的士司機「濫收」五毫車資、菲傭「打斧頭」十五大元，甚至隧道收費員「盜竊」一蚊，通通都要拉人封艇，執法巨細無遺，香港果然係名副其實嘅「法治之區」呀。

即係咁，行賄就係行賄，犯法就係犯法，學神入獄係咎由自取，唔怨得其他人，如果一定要怨，就怨自己細個冇好好讀書，唔識得「竊鈎者誅，竊國者侯」嘅道理。嗱，呢個世界就係咁唔公平啦，鬼叫你無權無勢，司法咪搵你祭旗，凸顯自己「大公無私」囉。你睇前特首曾蔭權爵士同佢嘅愛將、前廉記一哥湯顯明，被踢爆連串貪腐醜聞，罪證確鑿，但係到依家仲係逍遙法外，邊個夠膽郁佢哋呀。

講到呢度，太一叮不期然諗起台灣嗰單劫獄事件。聽講班囚犯係因為不滿阿扁可以保外就醫，覺得法律唔公正，所以鋌而走險，不過如果佢哋喺香港，相信早就激死咗，根本冇機會搞呢場大龍鳳。唔係咩，阿扁一落台就落鑊，都叫做坐咗幾年監吖，貪曾就唔同嘞，本報揭發佢「貪遍省港澳」劣行超過三年，廉記話就話已經完成調查，仲將個波踢畀律政司，律政司亦聲稱檢控工作「快完了」，但究竟落唔落「叉廚」，到依家都未有聲氣，前排之嘛，貪曾仲有閒情逸致遊郵輪河，你話班悍匪見到呢一幕，唔激到吐血身亡呀。

貪曾、貪湯案拖到天長地久唔在講，以壹淫媒老闆淫賤黎為首嘅一眾佔領黑手，明明又係罪證確鑿，又係罪大惡極，當局居然有法不依，放虎歸山，甚至鬧出「預約拘捕」嘅笑話。所以話啫，香港話就話喺法律面前人人平等，如果係港英餘孽，有洋人照住咯喎，法律一樣冇佢哋符。

正所謂，舉頭三尺有神明，港府官官相護，天界之神都睇得一清二楚。本報為雙貪案請求黃大仙指點迷津，結果都係上吉籤，暗示佢哋會獲得放生。你話嘞，貪官繼續逍遙法外，咁法治之都嘅金漆招牌係咪從此拆得吖，叮！