本虫返到壹全霉大樓，就見到淫賤黎揸住香燭左拜右拜，唸唸有詞好似鬼上身咁，作為首席擦鞋匠，我即刻撲埋去問個明白，淫賤黎口震震，震足成分鐘先吐出兩個字：「降頭！」

嘩！降頭？好x恐怖呀！係咪會喺個口嘔啲蜈蚣出嚟嗰種？本虫立馬丟低忠誠彈開九丈遠，淫賤黎也不怪責，只道：「阿虫，你跟我去印刷機房睇吓！」

一入到機房，陣陣陰風不知從何吹來，淫賤黎打住冷震指住天花板：「阿虫，呢啲叫霉降，你聽過未？班清潔工人講，有時啲霉會變成我個樣，有時又似個死字，總之嚇x死啦！仲有，我哋啲白報紙都起晒霉，死喇死喇死喇！」

本虫以尋訪世外高人解降為名笑住鬆人，哈哈哈，呢個死肥佬，竟然唔諗吓自己幢壹全霉日久失修，天花梗係滲水發霉啦！《爛果》印數日日尋底，啲白報紙梗係擺到爛啦！話壹全霉中降頭，都啱嘅，不過係中咗淫賤黎嘅淫賤降，先會似依家咁，衰到發霉呀！

第一手消息請下載on.cc東網iPhone/iPad/Android/Windows Phone Apps