政壇：搞搞政：創科局「難產」楊偉雄淪散工？
應屆政府倡議增設創新及科技局，但喺立法會遇到重重障礙，立法會財務委員會今日會開足八個鐘「馬拉松」式審議撥款，拉布嘅泛民議員已一早揚言，會透過提出幾百項動議同不停提問題，務求令創科局胎死腹中，據聞，依家連政府都不感樂觀，諗橋應付殘局，即將原本促進創新科技嘅工作，交由一個類似直接向特首梁振英報告、權力較大嘅諮詢組織嚟孭飛，而主席人選就係原本屬意任創科局局長嘅理工大學副校長楊偉雄，嘩，呢個位唔得就坐另一個位，楊偉雄算唔算科技「打雜」呢？
設計圖片及對白
「無糧」主席得車馬費
今日財委會傾創科局嘅撥款，已經係最後一次機會討論，聽聞政府都打定輸數，一旦撥款不獲通過，負責開局工作嘅官員就會第一時間出嚟批評泛民拉布，而傳聞嘅候任「局長」楊偉雄亦即刻面臨失業嘅問題。我哋收到風，政府已諗定後備招，宣布將現時由財政司司長曾俊華做主席嘅創新及科技督導委員會，改組成類似金融發展局嘅諮詢組織，只係做呢啲委員會嘅主席，頂多只有車馬費，楊偉雄要硬啃呢個「無糧」主席位。尋日一個活動上見到楊，被問到辭職係咪「兩頭唔到岸」時，佢笑而不答。
講起財委會，今個月二十七日仲有一次會議。政府消息人士話，會趁呢次會議處理一連串積壓嘅撥款申請，政府亦會考慮分別喺二十七日，以及三至五月財委會空窗期內加開會議。不過泛民拉布變得「無定向」，政府都要多絞腦汁至得。
