政壇：路祥安聞港大風波笑三聲

最近有關港大嘅傳聞多多，當中包括政府高層被指介入港大副校長人選嘅風波，令人不期然諗起十五年前，港大民意研究計劃總監鍾庭耀做民調而爆出嘅干預指控，事件中，特首辦原高級特別助理路祥安黯然下台，咁啱得咁蹺，近日港大又爆風波，闊別多時嘅路祥安亦現身一個新書發布會。

路祥安現身一個新書發布會。

路祥安現身，時機巧合得令人忍唔住感嘆，但佢就全神投入活動，仲好有耐性咁坐足兩粒鐘，留心聽講者發言，當佢準備離開時，我哋趁機問佢點睇家吓港大又有風波，有冇覺得十幾年之後咪一樣有咁嘅事發生？路祥安聞言保持笑容，只係「哈…哈…哈」咗三聲，又舉起右手話「對唔住，我冇乜嘢講」，然後笑住走人。