政壇：泛民借佔中年宵猛掠水
維園年宵尋日開市，唔少政黨都去擺檔。大部分泛民政黨都推出印有雨傘圖案嘅商品，擺明借佔領行動發新年財。其中公民黨更出搵錢奇招，一個雨傘造型嘅行李牌，兩星期前民陣遊行時賣三十八元，尋日竟然更坐地起價賣六十八元，勁加價近一倍，認真食水深，不過，佢哋搶錢冇得頂，其他泛民陣營嘅攤檔一樣食住佔領呢條水，加上一啲後生仔嘅檔口，唔怕頂爛市咩？
社民連仲叻，做無本生意。社民連主席梁國雄（長毛）話，今年出售嘅手繪布袋、黃傘、T恤同銅製雨傘吊飾，全部由熱心市民捐出，成本都唔使，其中手繪布袋索價一百八十元，相信今次唔豬籠入水都難喇！
至於工黨就賣模仿警方警告旗幟嘅產品，上面寫「撤回人大決定，否則隨街鳩嗚」，成本十幾蚊但就賣成八十蚊。除咗抽水賣雨傘運動商品，倒梁產品亦周圍都有，民主黨就有「抹走689」毛巾，印上特首梁振英（CY）卡通，兩條就賣六十八元九毫，認真掠水，唔知CY會唔會問佢哋追番啲分紅？
