立法會一連三日進行施政報告致謝動議辯論，但三日來，過去為咗拉布阻時間、成日要求響鐘計人數嘅響鐘黨只係要求過一次點算法定人數，試過即使會議廳得番小貓三四隻，響鐘黨都冇做嘢，唔通拉布一族轉咗性？答案係，諗多咗喇！事關響鐘黨之所以唔要求點人數，據聞同財務委員會主席張宇人（Tommy）嘅一句話有關。

話說Tommy早兩日見會議廳唔夠人，擔心拉布議員一要求響鐘點人就會搞到流會，於是就心生一條妙計。佢同一班響鐘黨話，如果佢哋響鐘點人搞到流會，佢就會即刻運用主席權力召開財委會，提早審議成立創新及科技局嘅撥款申請。雖然財委會主席係咪真係有權喺短時間之內召開會議呢點值得商榷，但響鐘黨驚偷雞唔成咪冚旗囉。

第一手消息請下載on.cc東網iPhone/iPad/Android/Windows Phone Apps