美國駐港總領事夏千福自佔領行動後行事低調咗，但對有「網絡二十三條」之稱嘅《版權（修訂）條例草案》就相當上心。繼上星期親赴立法會游說議員毛孟靜支持通過草案後，尋日再次現身立法會同議員陳志全（慢必）會面。慢必將佢同夏千福嘅合照放上社交網站，留言稱「與千福BB茶敍」。

慢必（左）喺社交網站自爆同夏千福見面。（互聯網圖片）

我哋問過慢必，佢話夏千福係就版權條例搵佢飲咖啡，雖然夏千福話香港喺保障知識產權方面比歐美地區落後十幾年，但慢必擔心條例「魔鬼在細節」，即使草案將戲仿、諷刺等作品納入豁免，仲有網民驚誤中副車被起訴；而現時條例傾到一半都冇，要趕及今個立法年度通過似乎有難度，難怪夏千福咁心急。

慢必又話，夏千福仲邀請佢去領事官邸食飯。咁啱得咁蹺，夏千福尋日朝早亦同美領館同事落灣仔街市辦年貨，唔知座上客係邊個呢？

第一手消息請下載on.cc東網iPhone/iPad/Android/Windows Phone Apps