佔領運動「幕後黑手」兼泛民「最大金主」壹傳媒集團前主席黎智英（肥佬黎），自早前再度被警方拘捕後一直甚少蒲頭，終日「屈」喺位於何文田嘅大宅內「玩自閉」，連佢班「搞事四人幫」老友都好少見面，唔知係咪擔心快將會被正式起訴，而驚到唔敢出街同冇面見人？上周五我哋發現外號「李漢奸」嘅民主黨創黨主席李柱銘上咗佢屋企，同「金主」密會逾兩粒鐘先捨得走。到尋日李漢奸再次現身黎宅，同樣逗留咗約兩粒鐘，唔通兩人嘅密會經已定期化，每逢周五唔見足兩粒鐘都唔安樂？

李柱銘繼上周五後再現身黎智英大宅，密會逾兩粒鐘始離開。

肥佬黎晚上與家人去機場，估計係趁「落鑊」前離港度歲散心。

李怡昨亦乘坐的士到黎智英大宅。

尋日中午約十二時十五分，李漢奸乘坐肥佬黎名下嘅七人車進入黎宅，《蘋果日報》專欄作家李怡其後亦乘坐的士到場，兩人前後腳入內密會肥佬黎，估計係一邊食午飯，一邊諗計反中亂港。大約二時半，李漢奸同李怡一齊坐七人車離開黎宅，期間久未露面嘅肥佬黎罕有現身，行出大門送「雙李」上車。隔住大閘都見到佢面容憔悴、木無表情。七人車駛走後，黎隨即返回大宅繼續「自閉」，但入夜後，肥佬黎又再出動，同家人坐車去咗機場，估計係趁「落鑊」前出外度歲散心，歎埋最後一次。

第一手消息請下載on.cc東網iPhone/iPad/Android/Windows Phone Apps