政壇：六四館撲水搬竇
搬竇煩，更煩嘅係買錯貨，啱啱住落又要搬！支聯會就係咁喇，佢哋二○一三年十二月用咗近一千萬元，買落尖沙咀商廈富好中心五樓，並斥資裝修，喺上址設立「六四紀念館」，一四年四月，紀念館卒之開幕啦，到依家未滿一年，主席何俊仁（AV仁）已經話考慮緊再搬！係因為紀念館官司纏身，定係有其他問題呢？
設計圖片及對白
賣樓恐蝕百萬裝修費
AV仁話，富好中心雖然位於尖沙咀，但入口「隔涉」，遊客要上去有困難。加上呢度實用面積得八百呎，根本唔夠地方搞吓活動，所以佢哋要籌款重新搬遷喎，佢仲透露，今年年宵有一大目標，就係籌募捐款用嚟搬遷「六四紀念館」，不過，要再買竇嘅開支好大，佢哋估計目標需要一千至二千萬，希望可以係一、兩年內籌到喇。副主席蔡耀昌補充，有咗依家嘅經驗後，佢哋度過如果要搞吓活動，應該需要一個大約二千呎、交通又方便嘅場地，所以暫時都未有心水。
家吓樓價高企，賣咗富好中心單位有無賺呢？蔡耀昌話無了解過，不過，估計應該唔會賺好多，始終樓價貴係針對住宅，至於商廈一直都咁上下。其實，「六四紀念館」當時裝修都用咗成百萬，如果真係賺得少少，佢哋分分鐘損手都有之。何況，由紀念館籌建開始，佢哋同大廈一方就有爭拗，仲畀業主立案法團入稟高院控告違反大廈公契規定嘅物業用途，依家單案未審完，支聯會已打算求去，可見問題難解決。
點都好，佢哋都定咗要再搬，撲水不遺餘力下，尋日嘅維園年宵開鑼日，支聯會就一如以往喺一號同二號攤位擺檔，售賣唔同嘅民運物品，包括《民主會戰勝歸來》民運歌集光碟同司徒華文集等。而「平反六四」T恤今年有新款式，一款寫有「六」字，另一款寫上「四」字，似乎係想藉此打開情侶衫市場。新商品亦包括五色民主女神像同「聚」字揮春，籌到嘅錢會支持國內因為聲援雨傘運動而被捕嘅維權人士。
