正所謂,天地有正氣,任何牛鬼蛇神都逃唔過正義傳媒嘅監督。本報前年率先踢爆民航處大花筒等連串醜聞,全城嘩然,唔止審計署發表報告狠批,立法會政府帳目委員會亦跟進調查,痛斥處長羅崇文故意疏忽職守,簡直匪夷所思。

未講帳委會嘅調查報告前,先重溫民航處嘅混帳事件,包括擅自擴建大樓面積一千五百平方米、擅自興建處長私人浴室、擅自改建舞蹈室、豪華K房及休息室等;耗費九千七百萬元購置家具及設備,其中價值逾六千七百萬元嘅保安及電子系統係先斬後奏,而購置嘅一百四十三部液晶體顯示器,亦較獲批嘅五十部多出近兩倍;最離譜嘅係,四年前豪花十五億元購入嘅新空管系統問題多多,啟用日期一拖再拖,家陣仲未用得,民航處唔止冇向供應商追究,反而貼錢修補,問你服未。

昨日因,今日果,聽吓帳委會點樣「痛斥」民航官僚吖。報告話喎,羅崇文「故意疏忽職守」,未有向立法會提供準確完整及沒有誤導成分嘅資料。委員會又譴責民航處及負責監督工程嘅建築署「蓄意公然違反」既定規則、規例及做法,情節至為惡劣,並極度關注呢種規避規則嘅文化若不加節制,可能會蔓延至其他政府部門咁話。

講到呢度,大家可能覺得奇怪,點解香港官場已經墮落到咁嘅地步。正如議員話齋,十幾年來從未見過咁嚴重嘅違規,民航處無規無矩,儼如獨立王國,唔怪得帳委會報告用到「痛斥」字眼,同譴責涉及貪腐嘅前廉政專員湯顯明一樣。話時話,民航官僚為咗私人享受,自把自為,完全唔當公帑係錢,就算係內地,咁嘅官員早就停職查辦,邊可能仲印印腳做處長吖。

聽吓民航處點樣解畫?佢哋話喎,會吸取教訓,提醒員工日後處理新建樓宇項目時須注意事項,並安排員工參加課程,加強項目管理及財務會計嘅知識及警覺性。喂,成件事涉及數以億元計嘅公帑,如果冇上司批准,下屬點夠膽擅作主張呀?何況大部分設施只供處長及高層享用,擺明質下屬食死貓啫。

羅崇文身為處長,揮霍無度,死不認錯,人格及誠信通通破產,如果咁都唔使炒魷魚,仲成世界嘅。計太一叮話齋,炒魷魚都未夠,既然羅崇文同貪湯平起平坐,廉署好應該介入調查喇,叮!

第一手消息請下載on.cc東網iPhone/iPad/Android/Windows Phone Apps