城中鏡:優惠券當利是錢 馬雲激嬲網友
農曆新年將至,內地一班科網巨頭又掀起一陣利是嘅攻勢。之不過,支付寶發紅包就激嬲咗一啲網友,網友有唔滿意會點?梗係改圖惡搞啦!
馬雲會送出六億元人仔嘅紅包(優惠券)畀支付寶用戶,惹起網民不滿。(資料圖片)
由馬雲「揸」fit嘅阿里巴巴喺今個月十一號至十九號期間,會送出總共價值六億元人仔嘅紅包畀用戶。嘩!咁大筆錢,馬雲真係好疏爽喎。咪住,係真金白銀嘅話先算。
抽中嘅網友原本滿心歡喜,以為搶到寶,點知發現大部分都唔係現金,只係啲好睇唔好用嘅優惠券,擺明只係引人又去佢個網度shopping啫。
有網友嬲嬲哋,索性將支付寶紅包改圖,變做五十萬嘅現金券,但只可以買波音747飛機。一架波音747閒閒哋都要一億五千幾萬美金,就算畀你好彩搶到個紅包,買隻機翼都未夠喇!網友改圖嚟諷刺阿里,勁有創意,所以話,莫得罪網友。