政壇：搞搞政：誘老鬼讓位 建仔出手奀

現時建仔擁有全港最多區議會議席，但唔少都係做咗好多年嘅資深區議員，屆屆連任，令黨內第二、三梯隊變晒中年人士都未上到位。建仔銳意搞年輕化，惟有推出銀彈策略，吸引資深區議員提早退休，避免黨內出現青黃不接局面。

做地區顧問 薪酬僅一萬

所謂銀彈策略，總之逢係年過六十歲嘅現屆區議員，如果肯自願退位，並成功培育出一名接班人，再加上贏得年底區議會選舉，就可以喺未來四年以月薪一萬元獲建仔聘請做地區顧問，變相有份糧養住，又可以協助第二梯隊接棒，絕對係一舉兩得。建仔推出呢個計劃，有傳係針對東區同屯門兩區嘅區議員，等佢哋醒目自動退休，唔好再霸住個位。

之不過，呢個計劃到底有幾多人參加，仍然係一個謎。甚至有現任資深區議員講笑話，呢個唔係肥雞餐，而係「瘦雞餐」，因為現時區議員薪酬差唔多加到三萬元一個月，再加上可以申報幾萬元辦事處開支，養住一大班助理同社區主任，都算係一份唔錯嘅「職業」，但假如退位後，就只係得番一萬元。

雖然肥雞餐並唔吸引，但若果真係咁有決心，咁不如佢哋嘅立法會兼區議會功能組別嘅議員葉國謙身先士卒，事關佢都年過六十，合晒資格食肥雞餐，其他資深區議員就無藉口喇！

再講，作為咁大嘅政黨，軍令如山，若要黨員退位，豈可不退？依家提出咁嘅建議，都係婉轉示意班資深區議員退位讓賢，而一萬元亦只係象徵式補貼，如果唔識知所進退，最終可能鬧翻收場，分分鐘要退黨競逐連任都未定。