政壇：圖書館多烏龍屈讀者「遲還」
公共圖書館管理被揭有錯漏。過去三年，讀者借書逾期未還嘅百分比輕微上升，但有市民如期還書後，仍被圖書館指未有歸還資料，被要求填寫「已歸還圖書館資料聲明」，同期填寫嘅聲明介乎三千至四千份不等，涉及嘅館藏數目為約三千四百至四千七百項，當中高達三成五的資料最終由職員喺圖書館內尋回。到底係邊一方面嘅錯？已經好明顯喇！
根據統計，舊年有兩成八嘅館藏最後喺圖書館內尋回。（資料圖片）
立法會議員涂謹申尋日提出書面質詢，話有讀者如期歸還圖書館資料後，仍被館方指未有歸還資料，但圖書館其後就喺館內尋回資料，民政事務局局長曾德成就以書面回應話，一二、一三及一四年讀者逾期歸還嘅資料數目均逾三百萬宗，佔外借資料嘅百分比輕微上升，由一二年的百分之六點○三增加至舊年嘅百分之六點○七。而填寫歸還資料聲明嘅個案，三年分別有約三千至四千多宗，舊年有兩成八嘅館藏最後喺館內尋回，一二及一三年嘅尋回比率更達三成五。
拋出一大堆數字後，德成局長又好似流水帳咁繼續話，讀者若發現圖書館嘅過期提示紀錄不正確，可聯絡圖書館職員即時跟進，職員會按守則喺圖書館內搜尋圖書，若最後未能尋回，會將報稱已歸還嘅資料以特別事項形式紀錄喺讀者嘅借書證內，館方會覆查個案作出適當跟進，一二及一三年，所有讀者提交嘅聲明均獲接納，舊年則只有三宗不獲接納。講到最後，佢先話為避免出錯，圖書館會加強員工嘅培訓喎。
