政壇：梁美芬狂食八仙果防疫
依家係流感高峰期，除咗有幾位立法會議員先後中招患上流感外，議員梁美芬嘅立法會辦公室早前都有唔少助理患流感，搞到佢連辦公室都唔敢返。梁美芬話近日流感肆虐，佢辦公室有唔少同事都要請病假，但之後復工又唔戴番個口罩，搞到佢焗住要開聲叫同事戴口罩，避免再散播病菌。
梁美芬話食八仙果可以抗流感，真係得？
不過，梁美芬話聽同事解釋，佢哋並非唔想戴口罩，而係因為辦事處啲口罩已經用晒，佢於是叫助理拿拿聲出去買番一批口罩備用，點知行勻成個金鐘都搵唔到，最後要問立法會秘書處借住幾個口罩頂住先。雖然同事已經聽話戴番口罩，但梁美芬仍然擔心會被傳染，寧願留喺樓下會議廳開會，面對泛民主派「拉布」，都唔肯返上辦公室工作。
唔單止咁樣，梁美芬仲狂食台灣出產嘅八仙果，聲稱可以防止喉嚨痛咁話喎。不過，據聞八仙果只係有止咳化痰嘅功效，感冒初期更加不宜進食，否則手尾仲長，至於可以抗流感就無聽過嘞！
