政壇：再做政改民調梁繼昌想轉軚？

之前都講過，立法會醫學界議員「怪醫」梁家騮日前喺業界「威脅」下，做咗個業界政改民調，仲暫時承諾會就政改投反對票。查實會計界議員Kenneth梁繼昌之前都做過業界政改民調，仲豪言話會唔理業界意見，同其他泛民主派議員一齊否決政改方案。

梁繼昌話有意再做業界政改民調。

不過，事隔幾個月，Kenneth透露有意再做政改民調，仲話如果有七成選民支持「袋住先」，佢會考慮跟業界意見投票。莫非佢想轉軚撐政改？

逾七成人支持方考慮

Kenneth話聽聞政府想以業界民意逼佢接受「袋住先」，既然政府出到呢一招，佢就決定先發制人，喺政府推出具體方案之後，諗住做多次政改民調，如果有超過七成選民支持「袋住先」，佢會考慮業界嘅意見。

但佢補充話，七成選民支持「袋住先」呢件事根本唔會發生，又話如果政府想準確收集業界意見，就應該舉行一次會計界大型公投。如果政府真係肯咁做，佢都只會參考民調結果，唔會轉軚支持方案喎。