聞說人稱富貴黨嘅自由黨一直有意招攬「法律超人」、九龍東立法會議員Paul謝偉俊加入，但阿Paul就拖到依家都仲未決定，佢尋日出席該黨青年團舉辦嘅Social Wednesday提到入黨一事，就話自己一直有癖好，就係唔喜歡婚姻關係，而入黨就好似結婚咁，都算係間接拒絕入黨邀請。

阿Paul形容自己同富貴黨關係算係「不打不相識」，自從○八年參選旅遊界功能界別議員時結緣，估唔到依家會成為該黨之友。對於入黨，阿Paul爆料話，一直唔喜歡婚姻關係，最鍾意吊兒郎當，而入黨就好似結婚咁，該黨又習慣喺立法會要統一投票，所以唔太適合。

自恃旁觀者清，阿Paul對富貴黨政策指指點點，佢話事實上香港依家行福利主義，該黨唔係只為商家發聲，而係堅持自由主義路線，做資本主義守護者。喺黨務方面，佢又話該黨有時太自由，黨員應該要有番啲黨性。阿Paul又唔肯入黨，又講咁多，究竟佢知唔知乜嘢叫「旁觀者不得(o依)牙鬆弶」o架？

第一手消息請下載on.cc東網iPhone/iPad/Android/Windows Phone Apps