政壇：新年搭馬航單雞頂硬上
話說馬來西亞航空MH370客機舊年三月喺吉隆坡附近海域離奇失蹤，馬來西亞兩星期前正式將客機失蹤定性為「意外」，推測機上所有乘客已經罹難。白鴿黨立法會議員「單雞」單仲偕話，年初一將會去吉隆坡旅行，但佢就因為貪平買咗馬航機票，搞到依家都有啲心慌慌。單雞話驚都無辦法，但已經買重旅遊保險，萬一出事都有得賠喎。
單仲偕一年前貪平買定今年年初一出發嘅馬航機票，但買完先知驚。
單雞透露，喺一年前以五千五百多元買入兩張馬航機票，諗住去雪邦（Sepang）打高爾夫球。不過，由於當時未出現客機失蹤事件，加上係今年年初一出發，所以佢淨係覺得成件事好抵，完全唔覺得有乜嘢問題。不過，之後發生馬航客機失蹤事件，佢就開始擔心會出事，但如果改買其他航空公司機票，初一出發最少都要成一萬元，所以佢先決定唔理咁多，繼續原定計劃。
