政壇：黎以德遲到痛失良機
泛民主派口口聲聲話要搞議會不合作運動，無論係工務小組或人事編制小組兩個委員會，都要大打「拉布」戰，不過，相信好少人敵得過瞓覺。尋日人事編制小組喺朝早八點半開會，可能時間太早，班泛民議員頭十五分鐘都唔見影，結果一早坐定定嘅建制派做「舉手機器」下，開會唔夠五分鐘，就閃電通過兩項政府開設職位建議，仲搞到運輸及房屋局常任秘書長黎以德遲到，真係人算不如天算。
設計圖片及對白
人事編制小組尋日一共有五項議程，但一開始時得六位建制派議員在席，委員會主席梁繼昌望來望去都唔見泛民議員蹤影，惟有問有無人想發言，建制派見難得無泛民阻頭阻勢，當然粒聲唔出啦，就咁舉手火速通過頭兩項動議，包括係食物及衞生局保留兩個首長級官員職位，同埋律政司保留一個副首席政府律師做調解工作。
錯過五分鐘 需下次再議
直到第三項議程講開設三個首長級職位做獨立保險業監管局工作，泛民都係得單仲偕孤軍作戰，結果又係十分鐘內通過動議。由於頭三項動議喺十幾分鐘內搞掂晒，搞到負責第四項議程嘅運房局常秘黎以德喺時間上失晒預算，搞到遲到，要委員會等咗佢五分鐘先至開始。
就係呢段「黃金」五分鐘，令黎以德飲恨成日，因為呢五分鐘，大部分泛民議員都已經「歸位」，建制派無得再開快車通過議程。十幾位泛民議員問完又問，社民連「長毛」梁國雄同新民主同盟嘅范國威，不滿港鐵獨大，白鴿黨嘅胡志偉就認為各種交通工具嘅角色、定位、路線布局等未能互相配合；人民力量嘅陳偉業反對進行研究，質疑當中有不可告人嘅政治目的。問足個半小時都未完成審議，要留番下次會議再討論。
可能黎以德都估唔到，遲咗五分鐘就令自己要花多無數時間精力應付泛民議員。經過今次教訓，相信佢以後會提早出席所有會議，又或者催眠，趁班泛民議員瞓着覺未醒，等佢哋冇得拉布，火速過關。不過，機會好多時只得一次，相信泛民未必會再開會遲到。
