政客走火入魔 立會何時剪布

即係咁，喺反對派拉布之下，創科局寸步難行，港府迫於無奈，要求財委會下周六情人節加開兩節會議，希望可以趕及二月十四日「死線」之前通過撥款。不過咁，呢個如意算盤係咪打得響，冇人敢寫包單，因為港府愈心急，反對派就愈玩嘢，咁樣鬥落去，結果盞一拍兩散嘅咋。

不可不知，下周六財委會會議係大限之期，如果加開四粒鐘都未能表決，成個創科局撥款程序就要從頭嚟過，之前做嘅所有嘢等於白做，你話係咪攞嚟搞吖。

唔係太一叮潑冷水，反對派為咗阻撓港府施政，已經到咗走火入魔嘅地步，又點會自動放下屠刀吖。呢，佢哋又玩嘢喇，有人話創科局冇迫切需要，不斷提出休會動議；有人就對情人節加開會議表示不滿，話好「無人情」喎。喺咁嘅情況下，就算有建制派議員願意「捨命陪君子」，唔介意通宵開會，結果都係兩睇嘅咋。

其實，講到無人情咯喎，政客為反對而反對，為拉布而拉布，連經濟民生都唔放過，最無人情嘅就係佢哋。呢班政客唯恐天下不亂，一味阻住個地球轉，搞到情人節都要加開會議，呢啲咪就係自作自受，唔衰攞嚟衰囉。

係人都知，發展創新科技係全球大趨勢，周邊地區早就搞到有聲有色，有啲甚至領先全球添，喺亞洲四小龍中，香港本來已經落後九條街，加上前朝曾蔭權爵士鼠目寸光，任內大搞「去科技化」，更加令香港創新科技嚴重滯後，再唔急起直追，想唔邊緣化都幾難。反對派為咗達到不可告人嘅政治目的，千方百計狙擊創科局，表面上係留難港府，阻撓施政，實際上係想拖死香港，與民為敵。

冇法子喇，政客嘅本質就係有破壞冇建設，佢哋擺到明不惜一切阻撓創科局撥款，到時肯定會將議會程序玩到盡，務求令創科局胎死腹中。所以話，就算情人節開會開通頂，都係浪費時間咋。

嗱，辦法唔係無嘅，除非咁喇，財委會主席盡快攞把鉸剪出來，一不做二不休，將呢匹「好長的布」一剪了之，咁就有得諗嘞，問題係，佢有冇咁嘅勇氣呢？叮！