曾任保安局局長嘅行政會議成員兼立法會議員葉劉淑儀,前日自爆早前因為誤信欺詐電郵,被黑客盜用銀行戶口密碼,竊取咗六萬五千元美金(約五十萬港元)。雖然葉劉已經成功攞番筆錢,但就被班議員同事「抽水」取笑,真係牛鬼蛇神出晒嚟。

設計圖片及對白

稱已攞番筆錢

白鴿黨嘅「單雞」單仲偕曾做過資訊科技界議員,佢力數葉劉「四宗罪」,首先係收到不明來歷電郵已經唔應該打開;第二係見到不明來歷嘅網址就唔應該開,更加唔應該輸入自己嘅密碼;第三係收到警告電郵就應該立即刪晒電腦啲資料;最後就係要改晒所有敏感嘅密碼喇。單雞仲寸爆話︰「要喺銀行攞錢唔易o架,所以佢(葉劉)嘅錯真係唔易犯。」單雞講得咁口響,唔知佢試過中招未呢?

經過嘅富貴黨前黨魁「田少」田北俊見到單雞講到興致勃勃,亦都忍唔住插嘴話,遲啲白鴿黨黨慶要送部唔會咁易被人偷到資料嘅電腦畀佢哋,又話自己「好水」,見到呢類電郵都唔夠膽亂咁撳,如果事件發生喺自己身上一定唔會講出來畀人笑喎,仲揶揄葉劉︰「仲話做特首喎?」與葉劉同樣係行會成員兼立法會議員嘅林健鋒亦都加把口「潤」葉劉「抽水」,話自己唔會用電郵匯錢,又強調佢處理行會文件係「一手交一手」,好安全咁話。

不過,葉劉今次係以受害人身份做咗新聞封面人物,大家真係唔恨得咁多,唔通靠貪腐醜聞、辭職、被褫奪職務或選舉落敗等見報先至馨香咩!

佢尋日就喺社交網話已經成功攞番啲錢,又解釋因為自己要參與嘅會議繁多,好多電話都未能接聽,銀行職員聯絡唔到佢,先發生呢件事。

第一手消息請下載on.cc東網iPhone/iPad/Android/Windows Phone Apps