政壇：議員傾撥款雙重標準

多個政黨政團嘅立法會議員都身兼區議員，並非討論係咪支持加薪，而係乘機呻唔夠實報實銷津貼，睇嚟大家都係睇住自己荷包先。

區議員功能界別議員葉國謙率先代同事發聲，話如果現任議員連任後唔搬辦事處，就冇得申請開設辦事處津貼。身兼九龍城區議員嘅李慧琼都話，電腦、相機等必需品，唔可以喺其他資助額中扣除，唔夠彈性喎。

勞工界議員兼離島區議員鄧家彪就呻話，電腦、影印機等器材都會有折舊，舊咗又要維修，加上影印機成四萬元一部，買咗就唔使再買其他嘢嘞。

鄧家彪仲話好似大嶼山咁大嘅選區，不如增加交通運輸費，並為助理設立約滿酬金，吸引高學歷、高能力人士做喎。

署理民政事務總署署長陳積志就建議，影印機呢啲嘢可以選擇租用，咁咪可以喺其他開支度扣減囉！估唔到啲議員唔識變通，要官員教番轉頭。