政壇：夏千福入立會唔敢說三道四
美國駐港總領事夏千福上任後高調咗一段時間，不時上演去飲茶、食蛋撻等騷味極重嘅戲碼，但自從外交部警告佢唔好說三道四之後，佢開始處於「半摺埋」狀態，絕口不提佔領行動，政改都唔敢亂講。
不過，尋日上午十點幾鐘，有人發現夏千福現身立法會，仲上咗八樓同公民黨「阿毛」毛孟靜會面，莫非佢又「身痕」密謀攪局？
游說支持「網絡廿三條」
阿毛向本報證實，佢同夏千福的確會面咗個零鐘，但兩人並非傾談政改呢啲敏感議題，而係討論立法會法案委員會審議緊嘅版權條例。阿毛話夏千福此行係想游說泛民主派支持有「網絡廿三條」之稱嘅版權條例。夏千福話由於香港嘅版權條例同外國相比非常落後，唔少美國公司亦因此而將基地撤離香港，如果香港再唔通過版權條例，將會影響外資對香港嘅信心。
被問到兩人有無談及政改問題，阿毛透露有問夏千福此行會唔會「說三道四」，對方就猛話「唔會」，態度似乎有所避忌。無他嘅，老美都收晒聲唔敢干預香港內部事務，做細嘅又有乜資格講嘢吖！
